'ഭർത്താവ് മോദി- മോദി എന്ന് പറഞ്ഞാൽ അത്താഴം നൽകരുത്, ഇതിനുശേഷം ഓരോ ഭർത്താവും ഭാര്യയെ അനുസരിക്കേണ്ടിവരും''; എഎപിക്ക് വോട്ടുചെയ്യാൻ സ്ത്രീകളോട് അഭ്യർത്ഥിച്ച് കെജ്രിവാൾ

ഡൽഹി; ലോക്സഭാ തിരഞ്ഞെടുപ്പ് പ്രചാരണത്തിന് തുടക്കം കുറിച്ച് അരവിന്ദ് കെജ്രിവാൾ. ഡൽഹിയിലെ സിവിക് സെന്ററിൽ നടന്ന വനിതാ അനുമോദന ചടങ്ങോടെയാണ് ആംആദ്മി പാർട്ടി പ്രചാരണ പരിപാടികൾക്ക് തുടക്കം കുറിച്ചത്. വരുന്ന ലോക്‌സഭാ തിരഞ്ഞെടുപ്പിൽ ആം ആദ്മി പാർട്ടിക്ക് വൻതോതിൽ വോട്ട് ചെയ്യണമെന്ന് മുഖ്യമന്ത്രി അരവിന്ദ് കെജ്‌രിവാൾ സ്ത്രീകളോട് അഭ്യർത്ഥിച്ചു.

ഈ ബജറ്റിൽ സ്ത്രീ ശാക്തീകരണത്തിനായി വലിയൊരു പദ്ധതി പ്രഖ്യാപിച്ചിട്ടുണ്ടെന്ന് കെജ്രിവാൾ പറഞ്ഞു. ശാക്തീകരണത്തിൻ്റെ പേരിൽ തട്ടിപ്പാണ് ഇതുവരെ നടന്നിരുന്നത്.

ഇപ്പോൾ ഞാൻ എല്ലാ മാസവും ഓരോ സ്ത്രീയുടെയും പേഴ്സിൽ ആയിരം രൂപ നൽകും. കാലിയായ പേഴ്സ് ശാക്തീകരണത്തിലേക്ക് നയിക്കില്ല. ഒരു കുടുംബത്തിൽ മൂന്ന് സ്ത്രീകളുണ്ടെങ്കിൽ മൂന്നുപേർക്കും ആനുകൂല്യം ലഭിക്കുമെന്നും കെജ്രിവാൾ പറഞ്ഞു.

'നിങ്ങളുടെ ഭർത്താക്കന്മാരെയും സഹോദരന്മാരെയും പിതാവിനെയും പ്രദേശത്തെ മറ്റ് ആളുകളെയും അവരുടെ നേട്ടത്തിനായി പ്രവർത്തിക്കുന്ന വ്യക്തിക്ക് വോട്ട് ചെയ്യാൻ ബോധ്യപ്പെടുത്തേണ്ടത് ഇപ്പോൾ നിങ്ങളുടെ ഉത്തരവാദിത്തമാണ്.

നിങ്ങളുടെ ഭർത്താവ് മോദിയെക്കുറിച്ച് സംസാരിക്കുകയാണെങ്കിൽ, അദ്ദേഹത്തിന് അത്താഴം നൽകരുത്, ഇതിനുശേഷം ഓരോ ഭർത്താവും ഭാര്യയെ അനുസരിക്കേണ്ടിവരും' കെജ്രിവാൾ പറഞ്ഞു.